среда, 08 февруари 2012, 16:56
Карл Лагерфелд: Британската кралица наликува на мојата баба
Познатиот моден креатор Карл Лагерфелд изјави дека британската кралица Елизабета „речиси наликува“ на неговата баба.
За весникот „Метро“ тој вели дека кралицата е само малку поразлична на баба му и така и се облекува и однесува, јави дописникот на МИА од Лондон.
Овој германски дизајнер смета дека монархијата во Велика Британија е добра за туристите, затоа што носи пари, но во основа е сосема непотребна. Тој сепак не е целосно определен како републиканец и антимонархист, па забележува дека „на карјот од краиштата, убаво е да се има монархија, бидејќи луѓето од секогаш сонуваат за неа“.
Лагерфелд, кој е познат по своите коментари за британската монархија, во една прилика има речено дека покојната принцеза Дијана била „убава и слатка жена, но глупава и будалеста“.
Овој моден дизајнер, многу популарен меѓу британските поддржувачи на високата мода, нема големо мислење ниту за новата британска пејачка ѕвезда Адел. - За мојот вкус, таа е малку повеќе дебела, но има убаво лице и божествен глас.
Помалку е критичен за американската пејачка Лана дел Реј за која вели дека „не е лоша“.
Германецот е посебно остар кон Русите, нарекувајќи ги мажите „мошне грди“ луѓе. - Доколку бев жена во Русија, веројатно ќе бев лезбејка, покрај толку многу грди мажи, тврди Карл Лагерфелд во „Метро“.