вторник, 21 февруари 2012, 17:40
Адел и Ед Ширан фаворити на вечерашното доделување на музичките БРИТ награди
Британската соул-дива Адел и пејачот и текстописец Ед Ширан се фаворити за освојување на британските музички награди, што ќе бидат доделени вечерва.
Адел, која минатата недела во Лос Анџелес освои шест Греми награди, е номинирана во три категории за БРИТ наградите, меѓу кои и за најдобар британски албум и за најдобра пејачка.
Предвидено е Адел да настапи на вечерашната манфиестација, што ќе биде нејзин прв настап во Велика Британија по минатогодишна операција на гласните жици.
Дваест и едногодишниот Ед Ширан е номиниран во четири категории - за најдобар британски албум, за најдобар пејач, за најдобар дебитант и за најдобар сингл со неговата нумера „The A Team“.
Групата „Блур“ ќе ја добие наградата за исклучителен придонес за музиката.
Покрај Адел и „Блур“ на вечерашната церемонија, меѓу останатите, ќе настапат и Ријана, Бруно Марс и Ноел Галагер.
Овогодишната манифестација на доделувањето на музичките БРИТ награди ќе ја води британскиот актер Џејмс Корден.