петок, 03 февруари 2012, 20:11
Протекоа детали за Windows Phone 8
Детали за претстојниот мобилен оперативен систем Windows Phone 8 завршија на интернет доцна синоќа, соопшти блогот Engadget.
Изворите на сајтот “пронашле“ видео клип на кој еден од менаџерите на проектот објаснува дека Windows Phone 8 ќе поддржува dual-core мобилни процесори и повисоки резолуции на екраните. Тоа имплицира за висока класа на уреди кои се планирани за предводници на платформата со кодно име Apollo.
Оперативниот систем ќе подржува и работа со надворешни SD мемориски картички и технологијата NFC (Near-field communications) за безконтактно плаќање.
Во основа софтверот ќе биде многу сличен на стандардната верзија на Windows 8 и на тој начин ќе започне единствениот екосистем на Microsoft помеѓу мобилните и десктоп уреди.
Од технолошкиот гигант ветуваат дека ќе вклучат и Skype интеграција во Windows Phone 8, која ќе им овозможува на корисниците да користат Wi-Fi интернет за спроведување на разговори преку интернет.
Според најавите, Windows Phone 8 Apollo ќе го направи своето деби на пазарот во последното тримесечје на 2012 година.