e premte, 03 shkurt 2012, 11:03
"Malev" i ndërpreu fluturimet për shkak të rrezikut nga falimentimi
Aerotransportuesi hungarez "Malev" sot në mëngjes i ndërpreu të gjitha fluturimet, pasi që paraprakisht Qeveria vendosi ta mbrojë nga kreditorët për shkak të rrezikut të drejtpërdrejtë nga falimentimi i aerokompanisë nacionale.
"Prej sot, pas 66 viteve punë të aerokompanisë, tashmë kurrfarë aeroplanë të "Malev"-it nuk do të qarkullojnë", deklaroi në kumtesë drejtori i përgjithshëm i kompanisë, Lorant Limburger.
Sipas tij, "Malev" ndodhet para një rreziku gjithnjë e më të madh nga insolvenca pas informatave se është në skaj të bankrotit, duke shtuar se furnizuesit kanë kërkuar pçagesë avansi "prej sot për nesër", duke e çuar kompaninë në pozitë shumë të rëndë.
"Malev" vite të gjata po përballet me probleme financiare. Në fillim të këtij viti, Komisioni Evropian kërkoi që Malev t'i kthejë paratë e marra nga arka shtetërore për periudhën 2007-2010 prej rreth 10 milionë euro. Malev ka humbje prej 24,6 miliardë forinta (1 dollar - 223,3 forinta) në vitin 2010.
Pas vendimit të këtillë Budapesti ndërpreu çfarë do lloj ndihme financiare për "Malev"-in.