e shtunë, 28 korrik 2012, 16:14
Në Tiranë u konfiskuan 100 kilogramë marihuanë
Gjashtë persona u prangosën, pasi u zbuluan duke transportuar një sasi prej 100 kilogramësh marihuanë, në afërsi të Tiranës, njoftojnë mediat shqiptare.
Lajmin e konfirmuan pasditen e së premtes burime policore. Arrestimet u bënë në kuadër të një operacioni të antidrogës, që zbuloi në flagrancë lëndën narkotike në dy automjete.
Makinat u ndaluan në afërsi të Vorës, paralagje e Tiranës. Në automjete ndodheshin në total gjashtë persona, të cilët u shoqëruan të gjithë në komisariat nga ana e forcave të rendit.
Aktualisht, identiteti i të arrestuarve nuk është bërë i ditur. Besohet se autoritetet kishin marrë informacion që më parë për këtë aktivitet kriminal dhe kishin vendosur në ndjekje të tyre prej disa kohësh.
Policia e shtetit ka ndëmarrë prej disa javësh një operacion madhor për shkatërrimin e rrjeteve të kultivimit dhe transportimit të lëndëve narkotike në vend.